पाल्पा – जिल्लाको महेन्द्रबोधि माविमा “बुक फ्रि फ्राइडे” सहितको शैक्षिक गतिविधि संचालन गरिने भएको छ । तानसेन नगरपालिका वडा नं २ मा रहेको महेन्द्र बोधि मा.वि. (एमबिएस स्कूल)ले शुक्रबारलाई बुक फ्रि फ्राइडेको रुपमा विविध कार्यक्रम गर्ने भएको जनाएको छ । विद्यालयले विद्यार्थीको प्रतिभा पहिचान गर्न बुक फ्रि फ्राइडेको रुपमा मनाउन लागेको हो । शुक्रवार सामान्यज्ञान, इङ्लिस ल्याङ्ग्वेज, विविध खेलकुद, साहित्य तथा संस्कृति, विज्ञान तथा प्रविधि अन्र्तगतका कार्यक्रमलाई समावेश गरी विद्यार्थीको खुबी खोजी गर्ने भएको छ ।
त्यस्तै, निजामती कर्मचारी, जनप्रतिनिधि, शिक्षकका छोराछोरीका लागि बिहान ९ बजेदेखि साँझ ५ बजेसम्म विद्यालय खोलेर विविध कार्यक्रम सहितको योजना समेत ल्याएको छ । विद्यालयले बिहान नियमित ९ बजे खोलेर १० बजेसम्म विद्यार्थीका लागि रिले रिडिङ, रिले राइटिङ, रिले स्पिकिङको कार्यक्रम ल्याएको हो ।
विद्यालयले कक्षागत सिट संख्या निर्धारण गरी विद्यार्थीको नेमप्लेट समेत राख्ने भएको छ । अब प्रत्येक कक्षामा ३० जना भन्दा बढी विद्यार्थी भर्ना नलिने विद्यालयले जनाएको छ ।
आगामी बर्ष विद्यालयले अनुशासन र शान्तिका लागि बौद्ध शिक्षा कार्यक्रम सञ्चालन गर्ने, बालमैत्री वातावरणमा मुस्कान सहितको विद्यालय प्रवेश, संगीत र पिटी सहितको प्रार्थना कार्यक्रम सञ्चालन गर्ने विद्यालयका प्रधानाध्यापक केशव के.सी.ले बताउनु भयो ।
त्यस्तै नेपालकै पहिलो सामाजिक प्रयोगशालामा सामाजिक विषय सिकाइ सहजीकरण हुने, शिक्षक र विद्यार्थीका लागि शैक्षिक सामग्री निर्माण कक्षको व्यवस्था गरिएको, सबै विद्यार्थीको पोर्टफोलियोमा प्रत्येक हप्ता प्रत्येक विषयको प्रोजेक्टवर्क र विद्यार्थीको प्रतिभालाई रेकर्ड राख्ने व्यवस्था भएको सहायक प्रधानाध्यापक हरिलाल गैरेले बताउनु भयो ।
विद्यालयले कक्षाकोठामै प्रविधिमैत्री शिक्षालाई जोड दिइने, हरेक पर्व र विदाका बेला विविध कार्यक्रम गरी विद्यार्थीको संस्कार र संस्कृतिको जगेर्ना गर्ने खालका कार्यक्रम समावेश गर्दै बिदा कम हुने विद्यालयको रुपमा स्थापित गरिने, पहिले भन्दा नतिजामा सुधार गरेमा पुरस्कृत गरी विद्यार्थीको आपूmसँग आफ्नै प्रतिस्पर्धा गराइने, पठन सिपको विकास गर्न लाइब्रेरीको भरपुर उपयोग गरिने विद्यालयका सामाजिक शिक्षक झविन्द्र देवकोटाले बताउनुभयो ।
उहाँका अनुसार उत्कृष्ट विज्ञान प्रयोगशालामै विज्ञान विषय गर्दै सिक्दै कार्यक्रम लागु गरिने, प्रत्येक कक्षामा बुक कर्नर, सबैभन्दा बढी विद्यालयलाई समय दिने शिक्षक र अभिभावकलाई सम्मान गर्ने योजना समेत विद्यालयले सार्वजनिक गरेको छ ।
विद्यालयले उत्कृष्ट नतिजा दिने शिक्षकलाई कक्षागत रुपमै वार्षिकोत्सवमा सम्मान गरिने, विद्यार्थी भलाईकोष दान पेटिका मार्फत विद्यार्थी प्रतिभा पुरस्कार प्रदान गरिने, अभिभावकसँग सम्पर्क कायम गर्न फोन डायरी कार्यक्रम, टोल भिजिट कार्यक्रम, अभिभावक शिक्षा लगायतका कार्यक्रम समावेश गरी विद्यालयलाई नमूना विद्यालयको रुपमा अगाडि बढाउने विद्यालय व्यवस्थापन समितिका अध्यक्ष सुशीला श्रेष्ठले बताउनु भयो
स्मरण रहोस्, विद्यालयमा चौथो ब्याचले अंग्रेजी माध्यमबाट एस.ई.ई. परीक्षा दिइसकेका छन् ।
